نسعى أن نصل بصناعة القهوة في مصر الى مستوى عالمي والهدف ان يتم ذلك بأيد مصرية والحلم أن يصل عمال وموظفى بن الجزار إلى ١٠،٠٠٠ فرد وتتوالى الاحلام في خدمة بلدنا دائماً بثقتكم فينا.

اتصل بنا 5085 5000 010

 

 

المقالات

مكونات البن المحوج المصري وفوائده

قبل ما تشتري اعرف الفرق بين البن المحوج والسادة والفاتح والغامق

عشان تشرب قهوتك مظبوطة على ذوقك وتستمتع بطعمها، لازم تبقى عارف كويس نوع البن وانت بتشتريه، وعارف الفرق بين البن المحوج والسادة ، والبن الفاتح والغامق وكمان الوسط.

درجة تحميص البن ده قد إيه؟ وإيه المراحل اللي بتمر بيها حبوب البن لغاية ما توصلك؟

ليه مهم انك تعرف ده؟ لأن كل مرحلة بتمر بيها القهوة بدايًة من مرحلة الحصاد وحتى التحميص والطحن والتعبئة بتختلف فيها نسبة الكافيين وبتغير من شكل القهوة ولونها وبالتالي طعمها.

وعشان أسوأ حاجة ممكن تقابلك انك بعد ما تشتري البن تكتشف ان مش هو ده الطعم اللي كنت بتدور عليه، جمعنالك أهم المعلومات اللي بتفرق في طعم وريحة القهوة، واللي من بعدها هتعرف ازاي تختار البن كويس قبل ما تشتريه.



 

الفرق بين البن الفاتح والبن الغامق

الفرق بين البن الفاتح والبن الغامق
الفرق بين البن الفاتح والبن الغامق

درجة لون البن بيتحدد أثناء عملية التحميص لحبوب القهوة. مرحلة التحميص هي مرحلة مهمة وأساسية – وإن كان البعض بيستغنى عنها أحيانًا – وتعتبر بمثابة تجهيز أو تحضير لحبوب البن عشان تبقى جاهزة على الاستخدام.

بتتراوح مدة التحميص ما بين 4 دقائق وحتى 17 دقيقة. وفيها بتتحول الحبوب من لونها الأخضر وريحتها العشبية الأولية، لشكلها المعروف وريحة القهوة النفاذة المحببة لينا جميعًا.

بيختلف طعم وريحة القهوة في مرحلة التحميص تبعًا لدرجة تحميصها. بيكون البن الفاتح هو الأقل في درجات التحميص، والبن الغامق هو الأعلى تحميصًا، مرورًا بالبن الوسط اللي بيتحمص لمدة وسط بين الاتنين.

البن الفاتح

بنحصل على البن الفاتح من الدرجات الأولى في التحميص واللي عندها بيكون حبوب البن بدأت تاخد اللون البني الفاتح، وبدأت ريحة الحبوب العشبية تتلاشى وتبدأ تظهر ريحة القهوة بشكل خفيف.

البن الفاتح بيحتوي على أعلى نسبة كافيين نظرًا لأنه اتعرض لحرارة قليلة فبالتالي ما زالت الحبوب فيه محتفظة بنسبة كبيرة من الكافيين. وغالبًا ما بيفضل عشاق القهوة النوع ده عشان يستمتعوا بطعم القهوة القوي ويستفادوا بأكبر قدر من الكافيين.

فوائد البن الفاتح

  1. بينشط الدورة الدموية وبيحسن من أدائها.
  2. بيحسن من الحالة المزاجية وبيزود إنتاجية الأشخاص.
  3. يحتوي على مضادات أكسدة قوية تقي من بعض الأورام.
  4. يحفز معدل حرق السعرات الحرارية في الجسم.
  5. يعمل على الوقاية من مرض النقرس.
  6. ينشط ضغط الدم.
  7. يقلل من نسبة الإصابة بمرض ألزهايمر.

 

البن الغامق

وأما البن الغامق فبينتج من الدرجات العالية في التحميص. كل ما زادت درجة الحرارة وطالت مدة التحميص كل ما زاد غمقان البن. نسبة الكافيين في النوع ده بتبقى أقل من البن الفاتح ولكن مازال له فوايده ومذاقه الخاص.

فوائد البن الغامق

  1. بيقلل من فرص الإصابة بمرض ألزهايمر.
  2. بيساعد في الوقاية من داء باركنسون “الشلل الرعاش”.

 

الفرق بين البن المحوج والسادة

من حيث الطعم بينقسم البن بشكل عام لنوعين، البن المحوج والبن السادة. الفرق بين الاتنين ببساطة ان في البن المحوج بيكون مضاف له مجموعة أعشاب ومنكهات بتكسبه طعم وريحة مختلفة بحسب النكهة اللي هتتضاف له، بنسمي الإضافات دي باسم “التحويجة”.

البن المحوج

البن المحوج بيكون مخلوط بنكهات مختلفة حسب التحويجة اللي اتضافت له زي القرفة أو القرنفل أو الزعفران أو الجنزبيل أو الحبهان وهو أشهرهم، وكتير غيرهم. ومحبين البن المحوج غالبًا ما بيميلوا للبن الفاتح مع التحويجة.

فوائد القهوة المحوجة

  1. بالرغم من مميزات القهوة السادة ومذاقها القوي إلا ان التحويجة بتضاعف من فوايد القهوة وبترفع من قيمتها الغذائية.
  2. بتساعد في الحماية من بعض الأمراض السرطانية والأورام لاحتوائها على مضادات الأكسدة.
  3. تحتوي على مضادات البكتيريا.
  4. تقي من أمراض القلب والقولون.
  5. القهوة المحوجة بتقلل من نسبة الإصابة بمرض الزهايمر.

 

البن السادة

أما البن السادة فهو عبارة عن حبوب البن المطحونة فقط بدون إضافة أي نوع من المواد أو الأعشاب والمنكهات اللي ممكن تغير من طعمه. وعشان كدة بيعتبره البعض أنقى نوع بن وبيفضله عشاق القهوة لما يحبوا يستمتعوا بطعم القهوة وبس!

بيتميز البن السادة بمذاقه الغني وطعم القهوة الواضح والصريح فيه.

فوائد القهوة السادة

  1. تساعد على خسارة الوزن لأنها بتزود معدل حرق السعرات الحرارية عشان كدة بيستخدمها البعض في التخسيس.
  2. ترفع معدل التركيز عند بعض الأشخاص لأن بها مادة الكافيين وهي بالأساس من المنبهات.
  3. تحسين الحالة المزاجية.





 

إيه أفضل نوع بن؟

لو كنت مبتدىء في شرب القهوة ولسة محددتش النوع اللي بتحبه، يبقى تختار بن محوج عشان هتدوق أطعمة مختلفة مع القهوة لحد ما تتعود عليها، بعدها انت تقرر هتجرب البن السادة ولا لسة شوية.

  • لو انت من عشاق القهوة ومن محبين الطعم النقي الأوحد يبقى تختار البن السادة عشان تستشعر طعم القهوة القوي لوحده.
  • لو كنت بتشرب القهوة عشان تركز اكتر يبقى البن الفاتح، عشان فيه أعلى نسبة كافيين.
  • لو ملقتش نفسك في اللي فات يبقى اختار البن الوسط أو الغامق.

لكل أنواع القهوة فوايد ومفيش أفضلية لنوع على أي نوع تاني، المسألة في طعم القهوة بالنسبة لك. في النهاية مفيش قهوة حلوة وقهوة مش حلوة، شرب القهوة أذواق وتفضيلات